L’uniun

Sco part dal moviment mundial en favur dal clima vulain nus, che la Svizra sviluppeschia ina strategia adattada per proteger il clima, e nus gidain stgaffir in avegnir che prenda resguard dal clima.

L’uniun

Sco part dal moviment mundial, procurain nus, ch’er la Svizra enchaminia la dretga via pertutgant il clima e nus gidain stgaffir in avegnir climaticamain supportabel. Igl è nossa finamira da cuntanscher in futur senza naginas emissiuns da gas da serra chaschunads dal carstgaun e senza diever d’energias fossilas.

Nossa visiun

Nus ans engaschain communablamain per in avegnir degn da viver – in avegnir cun in clima intact, in avegnir senza energias fossilas: per in meglier mund.

Nossa missiun

Nus furmain ina vasta rait independenta cun la quala nus stgaffin maioritads en favur da la protecziun dal clima an Svizra. Nus purschain a nossas sustenidras e noss susteniders la chaschun per daventar activas ed activs e per s’engaschar en lur agen conturn. Da quella moda e maniera cuntanschain nus er glieud ch’era polticamain pauc activa fin ussa. Noss’agir chapin nus sco contribuziun a las finamiras ed activitads dal moviment mundial en favur dal clima. L’Iniziativa per ils glatschers è noss instrument primar per francar mesiras ambiziusas en il dretg federal. Cun quellas instradain nus la midada da tendenza sin il livel politic naziunal. Per arrivar a questa finamira faschain nus punts tranter la politica e la societad civila entratschond champs politicas divergents.

Nossa finamira

L'Uniun svizra per la protecziun dal clima ha per mira che la Svizra fetschia ina politica climatica ch’è efficazia ed equilibrada. Per quest intent ha ella lantschà l'Iniziativa per ils glatschers. Plinavant creescha ella in moviment popular e procura cun sia lavur publica che las infurmaziuns necessarias en connex cun la midada dal clima vegnian derasadas.

Istorgia

Igl è stà il december 2015 ch’il schurnalist da l'ambient Marcel Hänggi ha prendì part da la conferenza davart il clima da Paris. Suenter che la conferenza è ida a fin cun success, è el stà conscient che la societad civila stoppia uss obligar las regenzas d’agir.

L'onn 2016 è madirada l'idea da lantschar in'iniziativa populara per francar las finamiras da la cunvegna da Paris en la constituziun. Marcel Hänggi ed ulteriurs experts han alura elavurà ina proposta per in'iniziativa populara federala per obligar la Svizra da sviluppar ina strategia per proteger il clima.

Ils 25 d'avust 2018 èsi stà var 80 persunas da differentas branschas che han fundà al pe dal glatscher dal Stein l'Uniun svizra per la protecziun dal clima. A chaschun da la radunanza generala dals 26 da schaner 2019 han alura decidì ils commembers da l'uniun da lantschar l'iniziativa per ils glatschers.